Suv resurslari bo‘yicha AQSh Geologiya xizmati missiyasi doirasida Qashqadaryo daryolari havzalarida ekspeditsiya tadqiqotlari o‘tkazildi

Xabar qilinganidek, shu kunlarda O‘zgidrometda AQSh Geologiya xizmati (USGS) ning suv resurslari bo‘yicha ekspertlar guruhi faoliyat yuritmoqda.

21-23 iyun kunlari O‘zgidromet, USGS va Xavfli geologik jarayonlarni kuzatish Davlat xizmati mutaxassislari ishtirokida Qashqadaryo daryolari havzalarida sel va ko‘chkilarga ko‘proq moyil bo‘lgan hududlarda dala tadqiqotlari o‘tkazildi.

USGS mutaxassislari Shahrisabz gidrologik stansiyasi faoliyati, kuzatuv gidrometeorologik tarmog‘ining tarkibi, gidrologik kuzatuvlar va o‘lchovlarni o‘tkazish, ma’lumotlarni to‘plash va qayta ishlash tamoyillari to‘g‘risida batafsil ma’lumot olish imkoniyatiga ega bo‘ldilar. Shunday qilib, gidrologik kuzatuvlar ma’lumotlarini qayta ishlash uchun mo‘ljallangan GE-1Win dasturiy ta’minot to‘plami USGS mutaxassislariga namoyish etildi. Shuni ta’kidlash joizki, ushbu tizim O‘zgidromet qoshidagi Gidrometeorologiya ilmiy-tadqiqot instituti gidrolog va matematik olimlari tomonidan ishlab chiqilgan va nafaqat O‘zgidromet markaziy apparati, balki uning hududiy bo‘linmalari ishiga ham tatbiq etilgan.

Tashrif davomida Jindidaryo va Oqdaryo daryolaridagi gidrologik postlarga ham tashrif buyurildi, bu yerda USGS mutaxassislari relefning geomorfologik, orografik xususiyatlarini, shuningdek xavfli gidrometeorologik jarayonlarni modellashtirishda foydali bo‘ladigan daryolarning gidrologik tartibini tushunish imkoniyatiga ega bo‘ldilar. Bundan tashqari, xavfli gidrometeorologik jarayonlarni kuzatish yondashuvlari va ularning oldini olish bo‘yicha idoralararo hamkorlik masalalari muhokama qilindi.

O‘zgidrometda AQSh Geologiya xizmati (USGS) missiyasi davom etmoqda.