O‘ZBEKISTON BO‘YICHA 2024 YIL 16-18 AVGUST KUNLARIGA OB-HAVO PROGNOZI

O‘zbekistonda so‘nggi 2 kun juda issiq bo‘ldi. Respublika hududining katta qismida havo harorati kunduz kunlari 39-41^o gacha, janubda ba’zi joylarda 42-44^o gacha, Termiz hududida 45^o gacha ko‘tarildi. 

Kecha kunduzi O‘zbekistonning shimoli-g‘arbiy hududlariga salqin havo kirib kelishi boshlandi, Qoraqalpog‘iston Respublikasida havo harorati 35-38^o dan 30-33^o gacha pasaydi.

Bugun va dam olish kunlari salqin havo O‘zbekistonning barcha hududlariga tarqaladi. Bugun va ertaga havo harorati asosan kunduz kunlari 31-36^o, yakshanba kuni esa 27-32^o atrofida bo‘ladi. Kechalari ham ancha salqinlashadi, harorat kechalari 17-22^o gacha pasayadi.

Shanba kuni Qoraqalpog‘iston Respublikasi, Xorazm, Buxoro, Navoiy viloyatlarining ayrim joylarida, yakshanba kuni Toshkent, Samarqand, Jizzax, Sirdaryo viloyatlarining ba’zi joylarida qisqa muddatli yomg‘ir yog‘ishi, momaqaldiroq bo‘lishi mumkin.

Ba’zi joylarda shamol tezligi 15-20 m/s gacha kuchayishi, chang-to‘zonlar bilan kuzatilishi mumkin.

Poytaxtimizda: havo biroz bulutli, vaqti-vaqti bilan o‘zgaruvchan bo‘ladi, bugun va ertaga yog‘ingarchilik kutilmaydi. Harorat asosan 33-36^o bo‘ladi.

Yakshanba kuni qisqa muddatli yomg‘ir yog‘adi, momaqaldiroq bo‘ladi. Harorat kechasi 19-21^o gacha, kunduzi 27-29^o gacha pasayadi. 

Sharqiy shamol yo‘nalishini o‘zgartirib, g‘arbdan 5-10 m/s tezlikda esadi, 10-15 m/s gacha kuchayishi mumkin.

2024 yil 16 avgust

O‘zgidromet