O‘zbekiston Respublikasi hududi bo‘yicha 10-13-yanvarga ob-havo prognozi

9-10-yanvar kunlari O‘zbekiston hududiga Rossiyaning Yevropa qismining shimoliy hududlari ustida shakllangan juda sovuq havo massasi kirib kelishi boshlandi.

Bugun kunduz kuni respublika hududining katta qismida qor yog‘adi, respublikamizning tog‘oldi va tog‘li hududlarini ba’zi joylarida kuchli bo‘ladi.

11-yanvarda faqat respublikamizning markaziy va sharqiy hududlarida jadalligi asosan biroz bo‘lgan qor yog‘ishi saqlanib turadi.

Keyinchalik hafta oxirigacha O‘zbekistonning barcha hududlari bo‘yicha asosan yog‘ingarchiliksiz ob-havo bo‘lishi kutilmoqda.

10-11-yanvar kunlari Surxondaryo viloyati va Farg‘ona vodiysi viloyatlarining ayrim joylarida shamol 17-22 m/s gacha kuchayishi kutilmoqda, ba’zida esa 23-25 m/s gacha kuchayishi mumkin.

Sovuq havoning kirib kelishi O‘zbekistonning barcha hududlari bo‘yicha haroratning sezilarli darajada pasayishiga sabab bo‘ladi.

Haftaning o‘rtasiga kelib, harorat kechalari 12-17^o sovuqgacha, ba’zi joylarda 20^o sovuqgacha, kunduz kunlari
5-10^o sovuqgacha, ba’zi joylarda 12^o sovuqgacha pasayadi. Eng kuchli sovuq respublika shimolida - kechalari 20-25^o sovuqgacha, Ustyurtda va Navoiy viloyatining cho‘l hududlarida 27-30^o sovuqgacha, kunduz kunlari 7-12^o sovuqgacha bo‘lishi kutilmoqda.

Ushbu haftaning oxirigacha anomal (g‘ayritabiiy) sovuq ob-havo saqlanib turadi.

O‘zbekiston bo‘yicha eng past harorat qiymatlari so‘ngi marta 2008-yilning yanvar oyida kuzatilgan. Respublika hududi bo‘yicha harorat 17-22^o sovuqgacha, ba’zi joylarda 24-26^o sovuqgacha, Qoraqalpog‘iston Respublikasi va cho‘l hududlarda 30-33^o sovuqgacha pasayishi qayd etilgan. O‘sha yilda Toshkentda minimal harorat 17,4^o sovuqni tashkil etgan.

1972, 1973, 1974 va 1977-yillarda respublika bo‘yicha ba’zi joylarda yanada qattiq sovuqlar kuzatilgan. Shimolda va cho‘l hududlarda bu yillarda harorat 33-38^o sovuqga yetgan. Toshkentda 1974-yilning yanvar oyida havo harorati 18,6^o sovuqgacha pasayishi qayd etilgan.