2022yil mart oyida ilgari kuzatilmagan jadal va davomiyligi uzoq muddatli yomg‘irlar yog‘di
17.03.2022
Darhaqiqat, bu yilning mart oyi juda yomg‘irli bo‘ldi. Shimoliy hududlardan tashqari, respublika hududining katta qismida yog‘ingarchilik miqdori oylik me’yordan sezilarli darajada ko‘p bo‘ldi. Respublikaning tog‘li va tog‘li oldi hududlarida yog‘ingarchilik odatdagidan 2-3 marta ko‘p bo‘ldi. Toshkentda deyarli 2 oylik yog‘ingarchilik miqdori yog‘di.
Jadal yomg‘irning davomiyligi ham anormaldir. 5 martdan bugungi kunga qadar deyarli har kuni biroz tanaffus bilan yomg‘ir yog‘di.
Eng kuchli yomg‘ir 11-15 mart kunlari kuzatildi. Respublika bo‘yicha ba’zi joylarda bir kecha-kunduzda yog‘gan yog‘ingarchilik miqdori ayrim kunlarda 25-40 mm, tog‘li hududlarda ba’zi joylarda 50-60 mm gacha bo‘ldi.
Shu bilan yomg‘irlar tugamadi. 18 martga qadar O‘zbekiston hududining katta qismida yomg‘irlar tanaffus bilan yog‘adi, ba’zi joylarda kuchli bo‘ladi. 18 martda respublika bo‘yicha ba’zi joylarda yomg‘ir qorga aylanish ehtimoli bor. Respublikamizning shimolida yomg‘ir va qor ko‘rinishidagi yog‘ingarchilik ushbu kunlarda biroz bo‘ladi.
18 martdan so‘ng yog‘ingarchilik 2-4 kunga tanaffus qilishi kutilmoqda. Keyinchalik, mart oyining oxirigacha bu kunlar kabi kuchli va uzoq muddatli yomg‘ir yog‘ishini biz kutmayapmiz.
2003, 2012 va 2021 yillarning mart oylarida ham juda yomg‘irli ob-havo kuzatilgan, ammo bu yilgi kabi jadal va davomiyligi uzoq muddatli yomg‘irlar ilgari kuzatilmagan edi.
Iqlimshunos olimlarning fikricha, global isish yog‘ingarchilik ko‘payishiga olib kelmaydi. Biroq, ular ekstremal ob-havo hodisalarining ko‘payishiga, shu jumladan, anomal quruq yoki anomal nam davrlarning takroriyligi ko‘payishiga olib keladi. Joriy yilning mart oyi buning yorqin tasdig‘idir.
