“Mardlar qo‘riqlaydi Vatanni”

14 yanvar – Vatan himoyachilari kuni va O‘zbekiston Respublikasi qurolli Kuchlari tashkil topgan kun sifatida nishonlanadi. Bayram sanasi O‘zbekiston Respublikasi qurolli Kuchlari tarixidagi quyidagi eng muhim voqealar bilan bog‘liqdir: 1991 yilning 31 avgust kuni «O‘zbekiston Respublikasi davlat mustaqilligining asoslari to‘g‘risida»gi O‘zbekiston Respublikasining qonuni qabul qilindi. Ushbu muhim hujjat yosh respublikamizga o‘zining harbiy siyosatini yuritish huquqini berdi. Shu kuni e’lon qilingan «O‘zbekiston Respublikasining davlat mustaqilligi to‘g‘risida»gi bayonot esa milliy qurolli Kuchlarimizni tashkil etish uchun huquqiy asos bo‘lib xizmat qildi. 1991 yil 6 sentabrdagi «Mudofaa ishlari vazirligini tashkil etish to‘g‘risida»gi O‘zbekiston Respublikasi Prezidentining Farmoni sohaning ilk poydevori sanaladi. 1992 yil 3 iyul kuni O‘zbekiston Respublikasi Prezidentining Farmoniga muvofiq O‘zbekiston Respublikasi Mudofaa ishlari vazirligi O‘zbekiston Respublikasi Mudofaa vazirligiga aylantirildi. 1992 yilning 14 yanvar kuni O‘zbekiston Respublikasi Oliy Kengashining «O‘zbekiston Respublikasi xududida joylashgan harbiy qismlar va harbiy o‘quv muassasalari to‘g‘risida»gi qarori juda muhim tarixiy ahamiyatga egadir. Mazkur qarorga ko‘ra davlatimiz hududidagi harbiy tuzilmalar respublika tasarrufiga olindi. 1993 yil 29 dekabr kuni O‘zbekiston Respublikasi Oliy Kengashining qarori bilan «14 yanvar – Vatan himoyachilari kuni» deb belgilandi. Vatan himoyachilari kunini nafaqat harbiy xizmatchilar, balki ayni vaqtda armiya saflarida o‘z burchini o‘tab qaytgan vatandoshlarimiz va ertaga xizmatga boradigan ming-minglab navqiron yigitlarning bayrami, deb qabul qilingan. Ona yurtimiz har doim o‘zining mard, jasur yigitlari bilan faxrlanib kelgan. Yigitlarimiz ota-ona va oilasini, o‘zi yashayotgan yurt tuprog‘ini muqaddas bilib, Vatan himoyasi uchun doimo shay turishni burch deb hisoblagan. Ushbu bayramning nishonlanishi xalqimizning o‘z milliy armiyasiga nisbatan cheksiz hurmatini, alp yigitlariga nisbatan iftixorini bildiradi. O‘zgidromet jamoasi nomidan barcha Vatan himoyachilarini ushbu muborak bayram bilan tabriklaymiz hamda ularga oilaviy tinchlik-xotirjamlik, sog‘liq-salomatlik tilab qolamiz. Hayotingiz doimo sharaf va zafarlarga to‘liq bo‘lsin. Vatanimiz osmoni doimo musaffo bo‘lishi uchun har doimgidek o‘z kuch-g‘ayratingizni ayamang! Barchani Vatan himoyachilari kuni bilan tabriklaymiz!

                   QUTQARUVChILAR

Siz borsiz, xotirjam yashayveramiz

Sizga ishonamiz bunda shunchalar.

Biringiz Alpomish, biringiz Farhod

Doim omon bo‘ling, qutqaruvchilar.

Tog‘dasiz, cho‘ldasiz, daryolardasiz,

Qaerdan sizdagi qudrat  bunchalar.

Har qanday holatda aloqadasiz,

Doim omon bo‘ling, qutqaruvchilar.

Kechami-kunduzmi elga madadkor

Saboq beraverar yillar va yo‘llar.

Yaxshiyam siz tayyor, yaxshiyam siz bor

Doim omon bo‘ling, qutqaruvchilar.

Vatan nima o‘zi, Vatan bu Ona

Kam bo‘lmas, onani qadrlovchilar.

Shu yorug‘ tonglarga etib shukrona

Doim omon bo‘ling, qutqaruvchilar.

Tinmas joningizga bersinda to‘zim

Kasbini har qachon e’zozlovchilar.

Bugun bayramingiz, so‘ngida so‘zim

Doim omon bo‘ling, qutqaruvchilar.

                            Sevara ORIPOVA   Gidrometeorologiya xizmati markazi  mutaxassisi